Babel fór til Hoffenheim

Ryan Babel gekk í gærkvöldi til liðs við þýska úrvalsdeildarfélagið Hoffenheim þrátt fyrir að Kenny Dalglish, stjóri Liverpool, hafi sagt annað í gær.

Dalglish neitaði því um miðjan dag í gær að Babel væri á leið frá félaginu en svo staðfesti Liverpool á vef sínum um kvöldið að kappinn væri genginn til liðs við Hoffenheim. Hann verður þar með liðsfélagi Gylfa Þórs Sigurðssonar.

Liverpool samþykkti tilboð Hoffenheim í Babel í síðustu viku og gekkst hann svo undir læknisskoðun hjá félaginu. En einhverra hluta vegna gengu félagaskiptin ekki í gegn.

Það fékkst þó loksins staðfest í gær og er talið að Babel hafi skrifað undir tveggja og hálfs árs samning við sitt nýja félag.

Babel er 24 ára gamall og kom til Liverpool frá Ajax árið 2007. Hann skoraði 22 mörk í 146 leikjum en náði aldrei að festa sig almennilega í sessi í byrjunarliðinu.