Obama sem uppvakningur veldur hneykslun

Repúblikanaflokkur Virginíufylkis hefur fordæmt tölvupóst sem sendur var á meðlimi flokksins í Loudoun sýslu. Í póstinum var boðað til skrúðgöngu á Hrekkjavöku í gær. Í honum mátti einnig finna mynd af Barack Obama, forseta Bandaríkjanna, í gervi uppvaknings. Hluta úr höfuðkúpu forsetans vantar og skotsár er á höfði hans.

Í póstinum var einnig mynd af Demókratanum Nancy Pelosi þar sem andlit hennar er afskræmt. Pelosi er leiðtogi Demókrata í fulltrúadeild Bandaríkjaþings.

Í tölvupóstinum kom fram að Repúblikanar myndu sigra heilalausa uppvakninga með íhaldssömum gildum.

Fylkisstjóri Virginíu, Robert. F McDonnell, sagði að tölvupósturinn væri skammarlegur.

Mark Shell, formaður nefndar Repúblikana í Loudoun sýslu, sagði að tölvupósturinn væri einungis léttlynd tilraun til að ljá Hrekkjavökunni pólitískri satíru.