Eiður: Ég vil fara til Ajax

Haft er eftir Eiði Smára Guðjohnsen í hollenskum fjölmiðlum í dag að hann vilji fara frá Stoke City og ganga til liðs við Ajax í Hollandi.

Eiður Smári hefur lítið fengið að spila með Stoke síðan hann fór til liðsins í lok sumars og ekkert síðan í lok október. Hann hefur aldrei fengið tækifæri í byrjunarliði Tony Pulis, stjóra Stoke.

Frank de Boer, stjóri Ajax, er sagður vilja fá Eið Smára ef félagið ákveður að selja Úrúgvæann Luis Suarez sem hefur helst verið orðaður við Liverpool á Englandi.

„Ég held að ég gæti nýst félaginu," sagði Eiður. „Ég er 32 ára gamall en hef alltaf hugsað vel um líkamann minn. Ég er í góðu formi og vona að reynsla mín og hæfileikar gætu hjálpðað félaginu. Ég var hjá Barcelona sem spilar sama kerfi og Ajax og tala þar að auki hollensku. Það er kostur."

„Ég hefði getað skrifað undir stóra samning í Ameríku eða Dúbæ. En ég vil fara til Amsterdam. Það er ekki peninganna vegna. Það sem mestu máli skiptir er áskorunin sjálf og ég vil koma ferli mínum aftur á skrið."