Muntari á leið til Sunderland

Umboðsmaður Sulley Muntari segir að líklegt sér að kappinn muni gera lánssamning við enska úrvalsdeildarfélagið Sunderland.

Muntari er á mála hjá Inter á Ítalíu en hefur lítið fengið að spila þar að undanförnu.

Hann er frá Gana en tveir landar hans sem eru á mála hjá Sunderland, þeir Asamoah Gyan og John Mensah, munu hafa sannfært Muntari um að koma til félagsins.

Í upphafi mánaðarins sagði Muntari að hann vildi frekar fara til félags sem væri staðsett í Lundúnum.

Umboðsmaður hans, Fabien Piveteau, sagði í samtali við enska fjölmiðla í dag að aðeins ætti eftir að ganga frá samkomulaginu við Sunderland.

Muntari lék með Portsmouth í ensku úrvalsdeildinni tímabilið 2007-8 en Inter keypti hann þaðan á 12,7 milljónir punda.

Hann er 26 ára miðvallarleikmaður og á að baki 57 landsleiki með Gana.