Mannskæðar sprengjuárásir í Nígeríu

60 manns hið minnsta létu lífið í sprengjuárásum og skotbardaga í Norður-Nígeríu í gærkvöldi, að sögn vitna. Þetta kemur fram í frétt The Telegraph.

Fjórar lögreglustöðvar og nokkrar kirkjur voru sprengdar og sprengjunum fylgdi skotbardagi árásaraðilanna og öryggissveita.

Enn er ekki vitað hverjir standa að baki árásunum, en öfgasamtökin Boko Haram hafa verið nefnd sem mögulegir gerendur. Boko Haram útleggst „Vestræn menntun er synd" uppá Íslensku. Þeir hafa staðið fyrir nokkrum hryðjuverkum síðustu mánuði. Meðal annars stóðu þeir fyrir bílasprengju við höfuðstöðvar Sameinuðu Þjóðanna í Nígeríu í ágúst síðastliðnum.

Ekki hefur fengist staðfest hvert mannfall varð í árásum gærdagsins, en lögfræðingur nokkur sem heimsótti ríkisspítala á svæðinu í leit að vini sínum fullyrti að þar lægju minnst 60 dánir.