Innlent

Ágúst neitar sök - meint fórnarlamb er 19 ára

MYND/GVA
Ungi maðurinn sem Ágúst Magnússon er grunaður um að hafa misnotað er 19 ára. Ágúst neitar sök en lögregla rannsakar nú tölvugögn hans.

Í Kastljósi í gær kom fram að Ágúst Magnússon, sem er margdæmdur barnaníðingur, hafi verið kærður fyrir kynferðisbrot gegn misþroska ungum manni.

Samkvæmt heimildum fréttstofu er ungi maðurinn er 19 ára maður, fæddur 1992.

Ágúst mun hafa komist í kynni við manninn á einkamál.is ekið með hann á afskekktan stað og brotið gegn honum kynferðislega.

Málið var kært í janúar en þá var ekki vitað um gerandann. Í mars beindist svo grunur að Ágústi eftir að rannsókn á tölvugögnum og ip tölum leiddu lögreglu á slóðina.

Í millitíðinni, eða í febrúar á þessu ári, lauk Ágúst afplánun á reynslulausn vegna dóms sem hann fékk árið 2004 fyrir kynferðisbrot gegn sex drengjum. Á meðan reynslulausninni stóð þurfti Ágúst að lúta margvíslegum skilyrðum fangelsismálastofnunnar, meðal annars um að sækja sálfræðitíma, hitta geðlækna og félagsráðgjafa.

Lögreglan rannsakar nú tölvur sem haldlagðar voru til að kanna hvort ágúst hafi átt samskipti við fórnarlambið í gegn um einkamál.is áður en hið meinta brot átti sér stað. Og hvort að hann hafi sett sig í samband við fleiri.

Ágúst neitar sjálfur sök í málinu. Hann er ekki í gæsluvarðhaldi og sat um síðustu helgi í kjördeild í Laugardalshöll í Icesave-kosningunum þar sem hann gegndi því hlutverki að gæta að því að reglum væri fylgt á kjörstað.


Tengdar fréttir

Barnaníðingur í kjördeild í Icesave-kosningunum

Ágúst Magnússon, dæmdur barnaníðingur, sat í kjördeild í Laugardalshöll í Reykjavík í Icesave-kosningunum sem fram fóru um helgina. Kjósendur sem þekktu Ágúst frá fyrri tíð eða af myndum úr fjölmiðlum brá nokkuð þegar það sá hann gæta að því að reglum væri fylgt á kjörstað, merktum kjörstjórninni. Gunnar Eydal, formaður kjörstjórnar í Reykjavík, staðfestir að Ágúst Magnússon hafi þarna átt sæti. "Við vorum alveg grunlaus," segir Gunnar. Hann tekur fram að kjörstjórn krefjist þess ekki að fulltrúar skili inn sakavottorði, og bendir á að kjörstjórn ræður til sín fyrir hverjar kosningar allt að 600 manns, þar af um 400 sem starfa í kjördeildunum sjálfum. "Það er erfitt að ná þessum fjölda," segir hann. Ágúst sat í þessari kjördeild í nokkrum kosningum hér á árum áður og er hefð fyrir því að leitað sé til fólks sem áður hefur starfað í kjördeildum. Gunnar segist ekki hafa þekkt til fortíðar Ágústs, þegar blaðamaður innti hann eftir því. Hann segir að ef forsvarsmenn kjörstjórnar hefði vitað af því að hann hafi verið dæmdur fyrir barnaníð hefði þurft að skoða sérstaklega hvort honum væri sætt í kjördeildinni. "Við hefðum þá skoðað það en ég get ekki sagt til um hvað hefði komið út úr því," segir hann. Það verður því lagt mat á það nú hvort Ágúst tekur oftar sæti í kjördeild, með hliðsjón af dómum hans og þeim mögulegu óþægindum sem kjósendur verða fyrir að hitta hann á kjörstað. Margdæmdur og á yfir höfði sér nýja ákæru Ágúst er margdæmdur barnaníðingur. Árið 2004 var hann dæmdur fyrir að misnota sex pilta kynferðislega. Árið 2007 gekk hann svo í gildru Kompás þegar hann var enn í afplánun vegna brotanna árið 2004 en þá hélt hann að hann væri að fara hitta 13 ára gamla stúlku. Í Kastljósi Ríkissjónvarpsins í gærkvöldi kom síðan fram að Ágúst á yfir höfði sér ákæru fyrir að hafa brotið kynferðislega gegn ungum misþroska manni fyrr á þessu ári. Ágúst var handtekinn á heimili sínu í síðasta mánuði og voru tölvur meðal annars gerðar upptækar á heimili hans. Í Kastljósi kom fram að hann hafi ekið með unga manninn á afskekktan stað og beitt hann kynferðislegri misnotkun. Í janúar í fyrra ákvað Fangelsismálastofnun að framlengja reynslulausn hans um eitt ár vegna þess að hann var talinn vera hættulegur. Ágúst var því á reynslulausn þegar hann braut gegn unga manninum.

Mest lesið


Fleiri fréttir

Sjá meira


×

Mest lesið