Kemur ekki til greina að lána Sturridge

Carlo Ancelotti, stjóri Chelsea, segir að það komi ekki til greina að lána Daniel Sturridge frá félaginu og helst þurfi að bæta við leikmannahópinn nú í janúar.

Sturridge hefur verið orðaður við mörg lið að undanförnu, til að mynda Liverpool. Hann hefur ekki verið fastamaður í liði Chelsea og mun hafa óskað þess að komast að hjá öðru félagi til að öðlast meiri reynslu.

„Sturridge er góður leikmaður og mun fá fleiri tækifæri í byrjunarliðinu hjá okkur. Hann hefur ekki beðið um að fá að fara annað á lánssamningi. Ef hann myndi bera þá bón fram myndi ég hafna henni umsvifalaust," sagði Ancelotti.

Chelsea hefur gengið skelfilega í ensku úrvalsdeildinni að undanförnu og aðeins unnið einn af síðustu átta leikjum sínum. Liðið er þó enn að keppa í ensku bikarkeppninni og komið í 16-liða úrslit Meistaradeildar Evrópu.

„Við erum ekki farnir að örvænta enn," sagði Ancelotti. „Ef enginn meiðist getum við tekið þátt í öllum þremur keppnum og barist um alla titlana."

„En þegar Meistaradeildin hefst aftur í febrúar er mjög mikilvægt að allir verði heilir í hópnum. Alex þarf þá að vera kominn aftur á fullt."

„Það er af þeim ástæðum að við erum að skoða það að styrkja liðið. Það verða allir leikir mjög mikilvægir eftir því sem líður á tímabilið."