Umfjöllun: FH-ingar fyrstir til að vinna KR-inga í sumar

FH varð í kvöld fyrsta liðið til að leggja KR-inga af velli í sumar, en þeir unnu bikarmeistarana ,2-1, á Kaplakrikavelli. FH-ingar léku líklega sinn besta leik í sumar og voru með undirtökin nánast allan leikinn.

Það var ekki fyrir en síðasta korter leiksins sem KR-ingar mættu til leiks. Atli Guðnason og Atli Viðar Björnsson gerði sitt markið hvor fyrir FH-inga en Kjartan Henry Finnbogason minnkaði muninn fyrir KR.

Bæði lið mættust ákveðin til leiks í kvöld, en KR-ingar fengu algjört dauðafæri eftir rúmlega fimm mínútna leik.  Guðjón Baldvinsson óð upp hægri kantinn, gaf flotta fyrirgjöf inn í teig sem rataði beint á kollinn á Gunnari Erni Jónssyni en hann skallaði boltann framhjá.

Eftir færið hjá KR þá tóku FH-ingar við leiknum og sóttu án afláts út hálfleikinn. Eftir um tuttugu mínútna leik komust heimamenn yfir þegar Atli Guðnason setti boltann örugglega í netið.

Atli leik á hvern varnarmann KR á fætur öðrum og lyfti síðan boltanum yfir Hannes Þór Halldórsson í marki KR. Markið hafði legið í loftinu og því var þetta sanngjörn staða.

FH-ingar héldu áfram sínu striki næstu mínútur og stjórnuðu ferðinni inná vellinum.

Rétt fyrir lok fyrri hálfleiks komust FH-ingar í 2-0. Björn Daníel Sverrisson átti magnaða sendingu inn fyrir vörn KR-inga sem rataði beint á Atla Viðar Björnsson sem lyfti boltanum snyrtilega yfir Hannes Þór í markinu.

Frábært spil og vel staðið að markinu hjá FH. Staðan var því 2-0 í hálfleik og útlitið svart fyrir KR-inga.

Seinni hálfleikurinn byrjaði af miklum krafti og FH-ingar héldu áfram að stjórna ferðinni. Heimamenn  fengu hvert dauðafæri á fætur öðru og KR máttu þakka Hannesi Þór Halldórssyni að fá ekki fleiri mörk á sig í byrjun síðari hálfleik. Hannes varði eins og skepna oft á tíðum og rétt hélt KR-ingum inní leiknum.

Þegar rúmlega hálftími var til leiksloka setti Rúnar Kristinsson, þjálfari KR, Dofra Snorrason inn á í liði gestanna og hann kom með ákveðin kraft með sér í leik liðsins.

Það Dofra aðeins fimm mínútur til að setja mark sitt á leikinn en hann átti frábæra sendingu á Kjartan Henry skallaði boltann í autt netið.

Síðasta korterið af leiknum var því æsispennandi.

KR-ingar pressuðu stíft að marki FH-inga í lokin og fengu tvö ákjósanleg færi til að jafna metin, en Gunnleifur Gunnleifsson, markvörður FH, sýndi hversu megnugur hann er og varði meistaralega í tvígang. Niðurstaðan því 2-1 sigur FH og toppbaráttan enn æsispennandi.

FH  2 – 1 KR

1-0 Atli Guðnason  (22.)

2-0 Atli Viðar Björnsson (42.)

2-1 Kjartan Henry Finnbogason (72.)

Skot (á mark): 17 – 15 (12-7)

Varin skot: Gunnleifur 6 – 10 Hannes

Horn: 17 – 6

Aukaspyrnur fengnar: 11–14

Rangstöður: 4-1

Dómari: Valgeir Valgeirsson 7