Cleverley verður frá í einn mánuð - er ekki fótbrotinn

Tom Cleverley, miðjumaður Manchester United, er ekki fótbrotinn eins og Sir Alex Ferguson óttaðist um eftir leik Manchester United og Bolton í ensku úrvalsdeildinni í gær. Liðbönd í vinstra fæti sködduðust hinsvegar og verður Cleverley frá í einn mánuð.

Tom Cleverley meiddist strax í upphafi leiks þegar Kevin Davies, framherji Bolton, tæklaði hann illa og var Cleverley útaf af vellinum þegar United komst yfir í 1-0 strax á fimmtu mínútu leiksins.

Tom Cleverley er búinn að stimpla sig inn á miðjuna hjá Manchester United en þessi 22 ára strákur var í láni hjá Wigan á síðustu leiktíð.

Hefði hann verið fótbrotinn hefði hann misst af nær öllu tímabilinu en nú ætti hann að geta komið til baka eftir fjórar til fimm vikur.