Haukur Páll: Þurfum að koma fjárhagslegu málunum úr hausnum á okkur

„Að sjálfsögðu erum við sárir. Við ætluðum að selja okkur dýrt eins og við vissum að þeir myndu gera en það gekk ekki upp í dag," sagði Haukur Páll Sigurðsson svekktur eftir 1-0 tap á heimavelli gegn Keflavík.

„Þeir féllu meira tilbaka í seinni hálfleik og reyndu að verja þessa 1-0 stöðu sem er svo sem skiljanlegt. Við náum ekki að opna þá almennilega. Fáum þó nógu góð færi til þess að skora en nýtum þau ekki."

Kristján Guðmundsson, þjálfari Valsmanna, hafði á orði við blaðamann að umræða um launagreiðslur hjá Valsmönnum hefði truflandi áhrif á leikmannahópinn. Hvernig líta leikmenn liðsins á málið?

„Þetta truflar mig persónulega ekki en ég held að svona hafi alltaf áhrif inn í leikmannahópinn. Þegar út í leikinn er komið vona ég svo innilega að þetta hafi ekki truflað hópinn. Eins og ég segi get ég bara svarað fyrir sjálfan mig. Þetta truflar mig ekki, ég var focuseraður á leikinn og ætlaði mér þrjú stig í dag. En svona hlutir hafa áhrif og slæmt þegar svona kemur upp."

Blaðamaður spurði hvort ekki væri mikilvægt að ganga frá þessum málum sem fyrst svo menn gætu farið að einbeita sér að boltanum á nýjan leik.

„Við reynum auðvitað að einbeita okkur að því að spila fótbolta og gera það eins vel og við getum í hverjum leik og á æfingum. Við þurfum að koma þessu út úr hausunum á okkur og byrja að spila fótbolta."

Valsmenn sitja sem stendur í fjórða sæti deildarinnar sem gefur Evrópusæti standi annað lið en KR uppi sem Íslandsmeistari. Eru markmið Valsmanna fyrir sumarið enn í sjónmáli?

„Við þurfum að skoða ýmis mál í okkar markmiðasetningu. Við vorum á fundi um daginn og þurfum að laga eitthvað smá. En við getum ennþá náð markmiðunum," sagði Haukur Páll sem nældi sér í gult spjald og verður í banni í næsta leik gegn Þór.