Gagnrýnd fyrir að ýta undir ójöfnuð foreldra

Ritfangaverslunin Office1 hrinti af stað nýrri auglýsingaherferð í byrjun júní undir yfirskriftinni „Við elskum mömmur". Íris Dögg Lárusdóttir, meistaranemi í félagsráðgjöf við HÍ, hefur sent kvörtun til fyrirtækisins, en hún segir herferðina ýta undir ójafnrétti foreldra.

„Mér finnst alltaf jafn sorglegt að sjá svo greinilega ýtt undir ójöfnuð foreldra og þar með viðhaldið þeirri hugmynd í samfélaginu að mæður séu betri eða meiri foreldrar en feður." segir Íris í bréfi sem hún sendi til fjölmiðla, en hún sendi einnig kvörtun vegna málsins á Kjartan Örn Sigurðsson, forstjóra fyrirtækisins.

Aðspurður hver hvatinn að baki herferðinni væri sagði Kjartan "Okkur finnast mömmur bara svo yndislegar. Við eigum öll mæður, og ekki nóg með það heldur eru það konur sem stjórna mest öllum innkaupum heimilanna í dag." Kjartan sagðist ekki hafa heyrt af kvörtun Írisar áður en fréttastofa hafði samband við hann í dag, en ef það stæðist væri það í fyrsta skipti sem honum bærist gagnrýni á herferðina til eyrna.

Hluti auglýsingaherferðarinnar felur það í sér að viðskiptavinir geta skráð nafn sitt í pott, en úr honum er daglega dreginn einstaklingur sem hlýtur tíu þúsund króna gjafabréf sem gildir í búðum Office1. Í auglýsingunni er leikurinn kynntur svo að ein mamma sé dregin út daglega, en að sögn Kjartans geta feður og barnlaust fólk einnig komist í hóp hinna heppnu. „Það eru bara allir í pottinum".

Aðspurður hvort herferðin ýti undir hugmyndir um þau hlutverkaskipti að mæður stjórni innkaupum og sjái um uppeldi barnanna á meðan feður einbeiti sér að vinnu og eigi smærra hlutverk í lífi barna sinna segir Kjartan „Mér finnst það ekki. Við höfum fengið mikið lof fyrir herferðina og ég á fastlega von á því að þessi herferð fái íslensku markaðsverðlaunin í vor. "

Kjartan var hikandi þegar það kom að því að ræða auglýsingaherferðir framtíðarinnar, en bætti þó við að lokum: „Við elskum pabba líka og við munum elska pabba líka í okkar auglýsingum í framtíðinni, alveg pottþétt."

Hægt er að skoða herferðina nánar á vef fyrirtækisins.