Rafael missir af bikarleik United á laugardag

Brasilíumaðurinn Rafael hlaut slæmt höfuðhögg í leik United og Blackpool í gær og mun missa af leik sinna manna gegn Southampton í ensku bikarkeppninni um helgina.

Uppbótartími leiksins í gær var mjög langur, heilar tíu mínútur, vegna meiðsla Rafael. United vann leikinn, 3-2, eftir að hafa lent 2-0 undir.

Rafael fékk þungt höfuðhögg í leiknum þegar hann lenti í samstuði við Marlon Harewood. Hann var fluttur á sjúkrahús þar sem hann fékk nánari skoðun en að henni lokinni var hann útskrifaður.

Hann fékk heilahristing og þarf að hvíla sig næstu daga. Hann missir því af bikarleiknum um helgina.