Van der Sar mun hætta í lok leiktíðarinnar

Edwin van der Sar hefur ákveðið að leggja hanskana á hilluna þegar að tímabilinu lýkur í ensku úrvalsdeildinni.

Van der Sar er orðinn fertugur og hefur varið mark Manchester United síðan hann kom frá Fulham árið 2005. Hann hefur spilað 245 leiki með félaginu og hefur þrívegis orðið enskur meistari og einu sinni Evrópumeistari.

„Það er nú tímabært að einbeita mér að fjölskyldu minni," sagði hann í yfirlýsingu sem birtist á heimasíðu umboðsmannaskrifstofu hans.

Eiginkona hans, Annemarie, fékk heilablóðfall árið 2009 og íhugaði van der Sar að hætta þá.

„Ég get ekki sagt að ég hafi tekið þessa ákvörðun á ákveðnum tímapunkti. Ég hef verið að velta þessu fyrir mér síðan að Annemarie veiktist."

„Hún náði með mikilli baráttu aftur heilsu og við ákváðum að ég myndi vera hjá Manchester United í eitt ár til viðbótar."

„Aldurinn minn hafði ekkert um þetta mál að segja. Ég er fertugur en mér finnst ég enn í góðu formi. Svo kom ákvörðunin. Ég veit ekki hvernig eða af hverju en ég vissi þetta bara. Það var nóg."