Hughton tekur líklega við WBA

Chris Hughton verður að öllum líkindum næsti knattspyrnustjóri enska úrvalsdeildarliðsins WBA en hann var rekinn frá Newcastle fyrr í vetur. Talið er að forráðamenn WBA greini frá ráðningu hans í dag en WBA hefur verið í viðræðum við Hughton undanfarna daga.

Roberto Di Matteo var rekinn frá WBA s.l. sunnudag en forráðamenn WBA töldu miklar líkur á því að undir stjórn Di Matteo myndi WBA falla úr ensku úrvalsdeildinni. Liðið er sem stendur í fjórða neðsta sæti með 26 stig en næstu þrjú lið þar fyrir neðan eru í fallsætunum. Wigan með 26 stig, Wolves með 24 og West Ham er neðst með 24 stig.

Michael Appleton mun líklega stýra WBA í næsta leik liðsins í deildinni gegn West Ham á laugardag.

Síðasti leikur Hughton hjá Newcastle var á heimavelli WBA, The Hawthorns, í desember s.l. þar sem að WBA hafði betur 3-1. Hann kom Newcastle upp í úrvalsdeild vorið 2010 og hann var valinn þjálfarinn í ensku 1. deildinni í kjölfarið.