Leikmönnum Newcastle hótað lögsóknum

Alan Pardew, stjóri Newcastle, segir að leikmenn liðsins verði mögulega lögsóttir fyrir samningsbrot ef þeir gagnrýna félagið á opinberum vettvangi, svo sem samskiptasíðunni Twitter.

Mikið er fjallað um málið í enskum fjölmiðlum í dag en aðgerðirnar koma í kjölfarið á gagnrýni Joey Barton á forráðamenn Newcastle á Twitter-síðu sinni.

Barton var settur á sölulista eftir að hann gagnrýndi helstu ráðamenn félagsins um allt það sem væri að ganga miður hjá félaginu. Vegna þessa var honum gert að æfa einn síns liðs og sektaður þar að auki um tveggja vikna laun.

Barton gagnrýndi félagið fyrir þá stefnu sem það hefur tekið í sínum leikmannamálum og þá sérstaklega þegar kemur að sölu leikmanna. Jose Enrique, sem hefur verið sterklega orðaður við Liverpool að undanförnu, tók í svipaðan streng á sinni Twitter-síðu.

Síðan þá virðast aðilar hafa náð sáttum en Pardew vill koma í veg fyrir að svona lagað gerist aftur. „Vandamálið er að fólk er að tjá sig á síðum eins og Twitter þegar það er í tilfinningalegu uppnámi,“ sagði Pardew við enska fjölmiðla.

„Það getur verið afar skaðlegt að láta eitthvað frá sér sem birtist síðan samstundis. Ekki aðeins þegar kemur að knattspyrnufélaginu heldur hvaða samtökum sem er.“

Pardew hefur ráðfært sig við Alex Ferguson, stjóra Manchester United, um málið. „Stefna United er að leikmenn meigi ekki tjá sig um félagið á Twitter. Við höfum látið okkar leikmenn vita af því að þessi stefna hefur verið tekin upp hjá okkur.“

„Sjálfsagt finnst leikmönnum þetta vera hart og eitthvað sem myndi tíðkast hjá einræðisherrum. En við þurftum að láta þá vita með formlegum hætti að ef þeir verða uppvísir að samningsbroti verða þeir sektaðir og þeim refsað fyrir það. Við getum ekki látið þetta líðast.“

Hafa margir dálkahöfundar í enskum blöðum látið í ljós þá skoðun sína að slíkar aðgerðir gangi ansi nálægt tjáningarfrelsi þeirra einstaklinga sem þarna eiga í hlut.