Umfjöllun: Vinnusamir FH-ingar kláruðu Blikana

FH-ingar fengu sín fyrstu stig í sumar þegar þeir unnu 4-1 sigur á Íslandsmeisturum Breiðabliks í 2. umferð Pepsi-deild karla í Kaplakrika í kvöld. Blikar misstu annan leikinn í röð mann af velli með rautt spjald.

Leikurinn byrjaði nokkuð fjörlega og fyrsta markið kom aðeins eftir ellefu mínútur. FH fékk hornspyrnu sem bakvörðurinn öflugi, Viktor Örn Guðmundsson, tók. Björn Daníel Sverrisson tók við boltanum, einn og óvaldaður á marteignum, og skallaði í netið.

Níu mínútum síðar unnu Blikar boltann á eigin vallarhelmingi. Finnur Orri gaf laglega sendingu inn fyrir vörn FH þar sem Haukur Baldvinsson var mættur í hlaupið. Hann hristi Ásgeir Gunnar, sem lék sem bakvörður í dag, af sér og klárði færið virkilega vel.

FH var sterkari aðilinn eftir þetta og fengu betri færi. Þeir voru duglegir að láta reyna á rangstöðugildru Blika sem hélt þó oftast vel. Hættulegustu færin komu þó eftir varnarmistök Íslandsmeistaranna en í bæði skiptin sá markvörðurinn Sigmar Ingi, sem leysti Ingvar Kale af hólmi í gær, við heimamönnum.

Blikar mættu nokkuð frískir til leiks í seinni hálfleik og léku betur fyrstu mínúturnar. En vörn FH-inga var afar sterk í þessum leik og gaf afar sjaldan færi á sér. FH-ingar fengu hættulegri færi og voru líklegri til að skora.

FH komst svo yfir á 62. mínútu og aftur kom markið eftir hornspyrnu. Í þetta sinn var það varnarmaðurinn sterki, Pétur Viðarsson, sem skoraði og kórónaði hann þar með glæsilegan leik. Viktor Örn gaf öðru sinni stoðsendingu og lék virkilega vel í kvöld.

Blikar fóru langt með að kasta leiknum frá sér á 68. mínútu, er Jökull Elísabetarson fékk áminningu fyrir brot. Hann brúkaði svo kjaft við dómarann og fékk því aðra áminningu nokkrum sekúndum síðar.

Það var aldrei spuring hvoru megin sigurinn myndi lenda eftir þetta. Atli Viðar Björnsson skoraði eftir mistök Elfars Freys í vörn Blika og Hólmar Örn innsiglaði sigurinn skömmu fyrir leikslok. Blikar fengu að vísu tvö fín færi til að minnka muninn en allt kom fyrir ekki.

Íslandsmeistararnir þurfa því að bíða enn eftir sínum fyrstu stigum í Pepsi-deildinni í ár en FH-ingar unnu sín fyrstu í kvöld. Þeir kvittuðu fyrir heldur karakterslausa frammistöðu í fyrstu umferðinni með öguðum og vinnusömum sigri í kvöld - semsagt dæmigerðum FH-sigri.

Blikar þurfa að líta í eigin barm en svo virðist sem að agaleysi og bitlaus sóknarleikur séu helstu vandamál liðsins í dag. Þá gerðu varnarmenn sig seka um of mörg mistök og þeir voru heppnir að FH-ingar refsuðu þeim ekki oftar fyrir þau.

FH – Breiðablik 4-1Dómari: Þorvaldur Árnason (7)

Skot (á mark): 13–3 (8-2)

Varin skot: Gunnleifur 1 – Sigmar Ingi 4

Hornspyrnur: 5–1

Aukaspyrnur fengnar: 9-13

Rangstöður: 11–3

FH (4-3-3):

Gunnleifur Gunnleifsson 7

Ásgeir Gunnar Ásgeirsson 6

Pétur Viðarsson 8 – maður leiksins

Freyr Bjarnason 7

Viktor Örn Guðmundsson 8

Hólmar Örn Rúnarsson 7

Björn Daníel Sverrisson 8

(81. Hákon Atli Hallfreðsson -)

Matthías Vilhjálmsson 7

Ólafur Páll Snorrason 6

Atli Guðnason 7

(74. Hannes Þ. Sigurðsson -)

Atli Viðar Björnsson 7

Breiðablik (4-3-3):

Sigmar Ingi Sigurðsson 7

Kristinn Jónsson 5

Kári Ársælsson 4

Elfar Freyr Helgason 4

Arnór Sveinn Aðalsteinsson 6

Guðmundur Kristjánsson 6

Jökull Elísabetarson 4

Finnur Orri Margeirsson 5

Arnar Már Björgvinsson 5

(73. Tómas Óli Garðarsson -)

Haukur Baldvinsson 6

(66. Viktor Unnar Illugason 5)

Kristinn Steindórsson 5