Capello: Mistök að taka ekki Walcott með á HM

Fabio Capello, landsliðsþjálfari Englands, viðurkennir að það voru mistök af hans hálfu að velja ekki Theo Walcott, leikmann Arsenal, í landsliðshóp Englands fyrir HM í Suður-Afríku á síðasta ári.

Ákvörðunin kom mörgum á óvart enda var Walcott valinn ungur að árum í HM-hóp Englands árið 2006.

Hann skoraði svo glæsilega þrennu í leik gegn Króatíu í undankeppni HM 2010.

„Hann er að spila núna eins og ég man að hann gerði þegar hann byrjaði að spila með okkur. Það var erfitt að ákveða að skilja hann eftir heima."

„Hann er einn af þeim leikmönnum sem ég hef hugsað mikið um eftir að heimsmeistarakeppninni lauk. Það voru mistök að velja hann ekki."