Bjössi Hreiðars: Ætli maður hafi ekki spilað með 0.1% þjóðarinnar

Sigurbjörn Hreiðarsson lék sinn síðasta leik með Valsmönnum gegn KR í dag. Hann var sáttur við lokaleikinn, fór yfir hápunktana og var þögull sem gröfinn varðandi næsta áfangastað.

„Jú, ég hefði ekki viljað enda þetta öðruvísi en að mæta KR á heimavelli. Í gegnum ferilinn hafa það verið skemmtilegustu leikirnir og ég var ánægður með þetta," sagði Bjössi sem fékk heiðursskiptingu í síðari hálfleik.

Sigurbjörn hefur spilað með Valsmönnum frá árinu 1992. Hann var beðinn um að meta hápunkta ferilsins.

„Allt náttúrulega. Titillinn árið 2007, bikarinn 2005 og svo var ótrúlega gaman að verða bikarmeistari árið 1992 þegar maður var að byrja í þessu. Maður hefur unnið fullt af titlum en það hafa einnig verið lægðir í þessu. Þetta hefur verið einn rússíbani. Bara að hafa verið hérna og spilað með öllum þessum frábæru einstaklingum, reyndar staldrað stutt við margir hverjir. Ætli maður hafi ekki spilað með 0.1 prósent af þjóðinni," sagði Sigurbjörn kíminn.

Sigurbjörn tók undir með blaðamanni að margt hefði breyst í knattspyrnunni frá því hann steig sín fyrstu spor í meistaraflokki.

„Já, þegar ég byrjaði mátti markvörður taka hann með höndum eftir sendingu frá samherja. Boltinn var allt öðruvísi. Þetta er orðið miklu fagmannlegra. Í dag eru allir í standi í knattspyrnu. Það fer enginn inn á sem er í einhverju rugli. Þú ert með átján menn sem eru að æfa allt árið á fullu. Þegar maður var að byrja í þessu var ekki svona mikil æfingasókn og alvara. Þetta hefur breyst mikið."

Sigurbjörn hefur líst því yfir að hann ætli að sparka áfam í bolta. Þó ekki í efstu deild.

„Það kemur í ljós. Það er ákveðið í gangi núna. Ég skoða það og ætla að sjá hvort það gangi ekki eftir. Þá tek ég það verkefni á fullu," sagði Sigurbjörn.

Á meðan undirritaður ræddi við Sigurbjörn gekk Rúnar Kristinsson, þjálfari KR, framhjá og grínaðist með að Sigurbjörn væri að fara að þjálfa Hauka. Sigurbjörn var þó þögull sem gröfinn

„Ég get ekki staðfest neitt núna. Það er á hreinu," sagði Sigurbjörn.