Áfram tilkynnt um nauðganir í Osló

Ekkert lát er á bylgju nauðgana sem hrellt hefur íbúa Osló í Noregi undanfarnar vikur. Þrátt fyrir mikinn viðbúnað lögreglu og um 600 sjálfboðaliða á vakt í miðborg Osló um helgina var samt tilkynnt um tvær nauðganir í borginni.

Í frétt um málið í blaðinu Aftenposten segir að það sem af er ári hafi 50 nauðganir verið tilkynntar í Osló, það er tvöfalt fleiri en á sama tímabili í fyrra.

Sjálfboðaliðarnir 600 komu m.a. úr röðum öryggisvaktmanna og slökkviliðsmanna sem voru á frívakt yfir helgina. Einn þeirra segir að þótt 1.000 sjálfboðaliðar mættu til leiks væri ómögulegt að vakta hvert götuhorn í borginni.