Crawley í skýjunum með bikardráttinn

Steve Evans, knattspyrnustjóri utandeildarliðsins Crawley Town, er í skýjunum með að mæta Manchester United í fimmtu umferðinni í ensku bikarkeppninni. Liðið er fyrsta utandeildarliðið í 17 ár sem kemst svona langt í bikarkeppninni.

„Það var súrealískt augnablik þegar nafn United kom upp. Við fengum leikinn sem allir landsmenn vildu. Ef þú ert Arsene Wenger eða Alex McLeish þá hefðir þú kannski ekki viljað þennan drátt en við vildum hann svo sannarleg," segir Evans kátur sem vonast eftir krafaverki.

„Við erum eina utandeildarliðið sem á möguleika á að vinna Manchester United og kraftaverkin gerast. Þetta verður stærsti dagur lífs okkar."