Messi: Aldrei jafn elskaður í heimalandinu

Lionel Messi er nú að undirbúa sig fyrir Copa America með argentínska landsliðinu og segir að hann hafi aldrei fyrr fundið fyrir jafn mikilli hlýju í sinn garð í heimalandinu.

Messi flutti aðeins tólf ára gamall til Barcelona á Spáni þar sem hann spilar nú. Margir hafa gagnrýnt hann fyrir að ná ekki að spila jafn vel með landsliði sínu og félagsliðinu - þar sem hann hefur slegið rækilega í gegn.

„Ég hef aldrei verið jafn mikið elskaður af fólkinu í Argentínu. Það hefur alltaf verið eini staðurinn þar sem ég fann ekki fyrir sömu væntumþykju í minn garð og í Barcelona.“

„Það hefur alltaf verið mikið talað um mig í Argentínu þar sem okkur í landsliðinu hefur því miður ekki tekist að vinna neitt. Mér hefur hins vegar tekist að vinna allt sem hægt er að vinna með félagsliði mínu og vonandi kemst ég á sömu braut með landsliðinu.“

„Draumur minn í sumar er að vinna Copa America. Við vitum allir hvað það er þýðingarmikið fyrir mig og Argentínu. Við erum með mjög gott lið og þetta er okkar markmið.“