Barcelona vill ekki greiða 35 milljónir punda fyrir Fabregas

Sandro Rosell forseti Evrópu og Spánarmeistaraliðs Barcelona segir að félagið vilji ekki greiða um 35 milljón pund fyrir Cesc Fabregas leikmann Arsenal – eða 6,5 milljarða kr. Rosell segir hinsvegar að spænski miðjumaðurinn muni gera allt sem hann getur til þess að komast til Barcelona í sumar.

Fabregas hóf feril sinn í herbúðum Barcelona en hann fór til Arsenal aðeins 16 ára gamall. Fabregas er fyrirliði Arsenal og Peter Hill-Wood stjórnarformaður Arsenal sagði í gær að Barcelona hafi sett sig í samband við enska félagið og óskað eftir viðræðum um Fabregas. Þetta er sama ferli og fór af stað í fyrrasumar þegar Arsenal hafnaði tvívegis tilboðum frá Barcelona í Fabregas.