Umfjöllun: Værukærir Valsmenn teknir í bólinu

ÍBV er komið í átta liða úrslit Valitor-bikarsins í knattspyrnu eftir 2-3 sigur á Val á Vodafonevellinum í kvöld. Leikurinn var bráðfjörugur og skemmtilegur. ÍBV virtist ætla að slátra leiknum en Valur komst óvænt inn í leikinn og hefði hæglega getað jafnað.

Fyrri hálfleikur var eign Eyjamanna frá a til ö. Þeir skoruðu þrjú góð mörk en Valsmenn komust inn í leikinn þökk sé gjafavíti frá arfaslökum dómara leiksins, Örvar Sæ Gíslasyni.

1-3 í hálfleik en allt annað var að sjá til Valsmanna í síðari hálfleik. Þeir minnkuðu muninn í upphafi síðari hálfleiks og voru óvænt komnir inn í leikinn þó svo þeir væru ekki búnir að gera nokkurn skapaðan hlut í leiknum.

Við annað markið byrjuðu Valsmenn aftur á móti að spila fótbolta á sama tíma og Eyjamenn drógu sig inn í skel.

Síðari hálfleikur var opinn og skemmtilegur en fleiri mörk komu ekki. Hörður Sveinsson fékk gullið færi í uppbótartíma en honum voru mislagðir fætur eins og svo oft áður í sumar.

Það var ótrúlegt að fylgjast með værukærð Valsmanna í upphafi leiks. Þeir voru algjörlega meðvitundarlausir. Hægir að elta út um allan völl. ÍBV tókst að teyma varnarmenn liðsins aðeins fram á völlinn og refsaði síðan með því að koma boltanum inn fyrir vörnina. Á þeim tíma voru Eyjamenn afar hreyfanlegir og Valsmenn vissu ekki sitt rjúkandi ráð.

Allt annað var að sjá heimamenn í síðari hálfleik en þeir hófu leikinn allt of seint og slíkt má ekki gegn klassaliði eins og ÍBV sem spilaði frábæran fótbolta í fyrri hálfleik.

Valur-ÍBV  2-3

0-1 Tryggvi Guðmundsson (8.)

0-2 Tryggvi Guðmundsson (14.)

0-3 Ian Jeffs (32.)

1-3 Guðjón Pétur Lýðsson, víti (41.)

2-3 Christian Mouritzen (49.)

Áhorfendur: Ekki gefið upp.

Dómari: Örvar Sær Gíslason  3.

Skot (á mark): 10-8 (7-5)

Varin skot: Haraldur 2 – Abel 5

Horn: 8-4

Aukaspyrnur fengnar: 9-11

Rangstöður: 4-1