Hópundirskriftir í Vesturbænum | 14 leikmenn skrifuðu undir hjá KR

KR-ingar héldu blaðamannafund í dag þar sem að tilkynnt var að fjórtán leikmenn hafi gengið frá samningum við Íslands- og bikarmeistarana fyrir titilvörnina í Pepsi-deild karla næsta sumar.

Stærsta frétt dagsins var að Þórsarinn Atli Sigurjónsson gekk frá þriggja ára samningi við KR en eins skrifuðu tveir aðrir ungir landsbyggðarmenn undir samning við Vesturbæjarfélagið og ellefu leikmenn framlengdu sína samninga.

KR-ingar hafa þar með náð í þrjá af efnilegustu leikmönnum landsins sem allir eiga það allir sameiginlegt að hafa verið í nokkurn tíma í stórum hlutverkum hjá sínum félögum þrátt fyrir ungan aldur.

Atli Sigurjónsson er 20 ára miðjumaður sem fékk sína fyrstu reynslu af Pepsi-deildinni í sumar. Atli náði ekki að skora í 17 leikjum sínum en lagði upp sex mörk fyrir félaga sína. Haukur Heiðar Hauksson, 20 ára fyrirliði KA og Þorsteinn Már Ragnarsson, 21 árs fyrirliði Víkings í Ólafsvík hafa líka gengið frá samningi eins og áður hefur komið fram, Haukur til þriggja ára en Þorsteinn til ársins 2015. 

Ellefu leikmenn framlengdu samning sína en það eru: Baldur Sigurðsson, Björn Jónsson, Dofri Snorrason, Grétar Sigfinnur Sigurðarson, Gunnar Þór Gunnarsson, Hugi Jóhannesson, Óskar Örn Hauksson, Kjartan Henry Finnbogason og Torfi Karl Ólafsson. Ásgeir Örn Ólafsson og Jordao Diogo hafa einnig framlengt samning sinn en þeir eru á láni hjá erlendum félögum.