Hriktir í stoðum kenningar Albert Einstein

Franskir og ítalskir eðlisfræðingar birtu í dag niðurstöður rannsóknar sem hófst þegar vísindamenn við Stóra sterkeindahraðalinn uppgötvuðu fiseindir sem ferðuðust hraðar en ljós.

Eftir að vísindamennirnir tóku eftir fyrirbærinu fyrr á árinu sögðu margir að mælingartæki hraðalsins væru í ólagi.

Samkvæmt afstæðiskenningu Albert Einsteins ferðast ekkert í alheiminum hraðar en ljósið.

Eðlisfræðingum hjá Stóra sterkeindahraðlinum (e. Large Hadron Collider) var því brugðið í september á þessu ári þegar þeir mældu fiseindir (e. neutrino) ferðast 60 nanósekúndum hraðar en lögmál ljósahraðans gerir ráð fyrir.

Eðlisfræðingarnir hafa nú hrakið ein helstu mótrök vísindasamfélagsins og sýnt fram á að mælingarnar hafi í raun verið réttar. Þeir segja þó að ómögulegt sé fyrir þá að færa sönnur á fyrirbærið - utanaðkomandi vísindamenn verði að sjá um það.