Ráðstefna um netöryggi haldin í Lundúnum

Yfirvöld í Bretlandi tilkynntu í dag að alþjóðleg ráðstefna um tölvuárásir verði haldin í Lundúnum. Fulltrúar frá 60 þjóðum munu mæta á ráðstefnuna til að ræða um öryggi í netheimum.

Í gær sögðu talsmenn Samskiptastofnunnar Bretlands að tölvuárásir á landið hefðu náð nýjum hæðum. Talið er að utanríkisráðherra Bretlands, William Hague, hafi boðað til ráðstefnunnar vegna þessa.

Mikill fjöldi sérfræðinga mun flytja erindi á ráðstefnunni, þar á meðal er stofnandi Wikipedia, Jimmy Wales, og Joanna Shield sem er hátt settur stjórnandi hjá Facebook.

Utanríkisráðherra Bandaríkjanna, Hillary Clinton, þurfti að afboða komu sína eftir að móðir hennar veiktist.