Raunveruleg og varanleg neyðaraðstoð fyrir Afríkubúa

Danskur líffræðingur vinnur nú að því í Afríku að þróa raunverulega og varanlega neyðaraðstoð fyrir íbúa álfunnar.

Aðstoðin felst í því að breiða út ræktun á Parkia trjám. Í ávöxtum þessara trjá eru æt fræ sem hafa álíka próteininnihald og hvert annað kjöt. Þar að auki vaxa þessi tré og ávextir þeirra hvort sem rignir það árið eða ekki. Fræin geymast svo óskemmd fram að næstu uppskeru við nær hvaða aðstæður sem er.

Líffræðingurinn Mette Kronborg frá Lífvísindastofnun háskólans í Árósum hefur dvalið í Afríkuríkinu Burkina Faso undanfarna mánuði við að þróa ræktun og útbreiðslu á Parkia trjám til annarra Afríkuríkja. Í Burkina Faso og nágrannalöndum er tréið vel þekkt og úr fræjum þess er búinn til rétturinn suombala. Hann er meðal algengustu matvæla þar um slóðir.

Mette segir í samtali við Jyllands Posten að því miður geti þetta verkefni ekki komið í veg fyrir hungursneyðina sem nú geisar á horni Afríku. Hinsvegar gæti það fyrirbyggt fleiri slíkar í framtíðinni.