Málin flækjast hjá meintri barnsmóður Biebers

Yfirvöld í Los Angeles í Bandaríkjunum ætla hugsanlega að rannsaka meint ástarævintýri stórstjörnunnar Justin Bieber og Mariah Yeater, 19 ára stúlku frá San Diego.

Yeater segir að hún og Bieber hafi átt ástarfund baksvið eftir tónleika hans í San Diego. Nokkru seinna eignaðist Yeater barn og hún telur að Bieber sé faðirinn.

Hún krefst þess að Bieber gangist undir DNA próf til að sanna faðernið. Einnig vill hún að Bieber greiði meðlag.

En málið gæti þó haft ófyrirséðar afleiðingar fyrir Yeates.

Lögreglan í Los Angeles segir að ef barnið sé runnið undan lendum Biebers þá sé Yeater sek um að hafa átt samfarir við einstakling undir lögaldri - Bieber var 16 ára þegar meintur getnaður átti sér stað.

Yeater gæti því átt yfir höfði sér allt að þriggja ára fangelsi.

Aðdáendur Biebers - sem kalla sig Beliebers - eru æfir yfir ásökunum Yeater. Margir hafa hótað henni lífláti.