Tvö þúsund ferðalangar fastir við Everest

Um tvö þúsund ferðalangar eru fastir við fjallsrætur Mount Everest vegna óveðurs sem hefur stöðvað flugsamgöngur við flugvöllinn í bænum Lukla í Nepal. Á meðal þeirra sem eru fastir eru ferðamenn og leiðsögumenn en þeir hafa verið veðurteptir á svæðinu í fimm daga. Fréttamaður breska ríkisútvarpsins segir að matarbirgðir á hótelum á svæðinu séu að klárast og þá hafa sum hótelin þurft að grípa til þess að nota matsali sem svefnhótel. Samkvæmt veðurspám er ekki búist við því að óveðrið gangi niður á næstu dögum.