Vinnur að myndun þjóðstjórnar

George Papandreou, forsætisráðherra Grikkja vinnur nú að myndun þjóðstjórnar í landinu, en ríkisstjórn hans stóðst vantrauststillögu á gríska þinginu í gær og hélt þar með velli.

Forsvarsmenn helsta stjórnarandstöðuflokksins, Nýs lýðræðis, hafa hins vegar lýst því yfir að þeir muni ekki taka þátt í myndun þjóðstjórnar með Papandreou, að því er fram kemur á fréttavef BBC.

Papandreou mun hitta Karolos Papoulias, forseta Grikklands, núna klukkan tíu að íslenskum tíma, til að greina honum frá áformum um myndun þjóðstjórnar. Papandreou kom heimsbyggðinni á óvart, en þó sérstaklega leiðtogum ríkja á evrusvæðinu, þegar hann tilkynnti á mánudag að björgunarpakki til handa Grikklandi færí í þjóðaratkvæðagreiðslu í landinu. Hann hefur nú fallið frá þessari tillögu sinni og verður það í höndum nýrrar samsteypustjórnar að taka ákvörðun um framhaldið.