Facebook virkar ennþá

Eins og flestir hafa eflaust tekið eftir er samskiptamiðillinn facebook enn uppi þrátt fyrir að tölvuhakkargengið Anonymous hafi hótað að loka síðunni í dag. Fram kom fyrr í dag að árásin ætti að hefjast klukkan eitt í að íslenskum tíma. Enn hafa þessar umræddu árásir því engan árangur borið.

Eitthvað fer þó tvennum sögum af því hvort það sé raunverulega Anonymous sem stendur að baki hótununum. Í myndbandi sem hlaðið var inn á youtube í ágúst síðastliðnum, nokkrum dögum eftir að hin upprunalega hótun birtist, kom fram að orðrómurinn væri lygi. Þar er fullyrt að hinn raunverulegi Anonymous-hópur ætli sér ekki að ráðast á facebook. Þó að hópurinn sé ekki hrifinn af starfsemi síðunnar telja þeir árás á hana veikja málstað þeirra. Hér má sjá umrætt myndband.

Það er aftur ekki sjálfgefið að þetta myndskeið stafi frá Anonymous heldur, enda getur hver sem er opnað aðgang að youtube og hlaðið inn svipuðu myndböndum.

Það er því ekki öruggt að nokkur árás sé í gangi yfir höfuð. Hvað sem því líður liggur allavega fyrir að facebook er enn opið, mörgum eflaust til nokkurrar ánægju.