Vinnur að myndun þjóðstjórnar

Gríska þingið lýsti yfir  trausti á ríkisstjórn George Papandreou  með naumum meirihluta í gærkvöldi. Papandreou  vinnur nú að myndun þjóðstjórnar og hefur fallið frá tillögu um að björgunarpakki til handa Grikkjum fari í þjóðaratkvæðagreiðslu.

Ríkisstjórn Papandreous fékk stuðning þingsins með 153 atkvæðum af 300 á gríska þinginu. Papandreou fundaði með Karolos Papoulias, forseta Grikklands, klukkan tíu að íslenskum tíma til að greina honum frá áformum um myndun þjóðstjórnar. Forsvarsmenn helsta stjórnarandstöðuflokksins, Nýs lýðræðis, hafa þó lýst því yfir að þeir muni ekki taka þátt í myndun slíkrar stjórnar með Papandreou, en hann hefur lýst því yfir að hann muni sjálfur biðjast lausnar við myndun nýrrar samsteypustjórnar.

Í ræðu fyrir gríska þinginu seint í gærkvöldi sagði Papandreou, sem hefur fallið frá tillögu sinni um þjóðaratkvæðagreiðslu um björgunarpakka eftir mikinn utanaðkomandi þrýsting, að það yrði í höndum nýrrar ríkisstjórnar að tryggja björgunarpakkann, sem samþykktur var í Brussel hinn 26. október síðastliðinn, en stórir gjalddagar eru á lánum gríska ríkisins í desember og því allt útlit fyrir að landið fari í greiðsluþrot fáist ekki fjárhagsaðstoð.

Nicolas Sarkozy, forseti Frakklands, og Angela Merkel, kanslari Þýskalands, tilkynntu Papandreou fyrr í vikunni Grikkland fengi ekki frekara fjármagn frá Evrópusambandinu ef björgunarpakkinn yrði ekki samþykktur. Auk þessara yfirlýsinga og mikils utanaðkomandi þrýstings heima fyrir ákvað Papandreou að falla frá tillögu um þjóðaratkvæðagreiðslu. Skoðanakannanir bentu til þess að björgunarpakkinn yrði felldur í þjóðaratkvæðagreiðslu, en það hefði mögulega þýtt endalok evrusamstarfsins fyrir Grikki.

Fréttaveitan Reuters greinir frá því að Evangelos Venizelos, fjármálaráðherra Grikkja, hafi tryggt stuðning minni flokka á gríska þinginu við samsteypustjórn sem hann komi til með að leiða. Ný ríkisstjórn muni síðan boða til kosninga innan fárra mánaða eftir að fjárhagsaðstoð frá Evrópusambandinu er í höfn en samkvæmt Reuters er rætt um að þingkosningar verði í febrúar á næsta ári.