Sekt fyrir að vera of gamall til að dansa

43 ára faðir var á dögunum sektaður í Ástralíu fyrir að vera of gamall til að dansa.

Richard Fuller var á tónleikum með rokkhljómsveitinni Cold Chisel með dóttur sinni í síðasta mánuði. Hann stóð uppá stól sínum í rokna stuði þegar dyravörður greip hann niður og vísaði honum út með þeim orðum að hann væri of gamall til að dansa. „Fólk er komið til að sjá hljómsveitina, ekki einhvern gamlan gaur."

Fuller fékk síðan sekt uppá rúmar 50.000 kr. vegna uppákomunnar nú fyrir nokkrum dögum.

Dyravörður staðarins heldur því fram að Fuller hafi slegið sig þegar hann var leiddur út. Það sé ástæðan fyrir sektinni. Þeirri staðhæfingu hafa feðginin staðfastlega neitað.