Áætlun Berlusconis samþykkt en meirihlutinn sat hjá

Umdeild atkvæðagreiðsla um fjárlagafrumvarp var samþykkt rétt í þessu í neðri deild ítalska þingsins. Frumvarpið var samþykkt með 308 atkvæðum en 321 þingmaður ákvað að sitja hjá í málinu og greiða ekki atkvæði.

Frumvarpið nær því fram að ganga, en þó fyrir atbeina minnihluta þingmanna. Þetta hlýtur að teljast sigur fyrir Silvio Berlusconi forsætisráðherra, þó ekki sé hann sætur. Stjórnarandstaðan segir ljóst að hann hafi með þessu misst meirihluta sinn í neðri deildinni.

Berlusconi hefur verið undir gríðarlegum þrýstingi síðustu daga og síðast í dag krafðist Umberto Bossi, leiðtogi Norðurbandalagsins þess að hann segði af sér. Flokkur Bossi er næst stærstur á þinginu í Róm og því þarf Berlusconi að reiða sig á hann. Mikil óvissa er því uppi um framtíð ríkisstjórnar Berlusconis.