Anonymous ætlar að slá Facebook út þann 5. nóvember

Tölvuþrjótahópurinn Anonymous ætlar sér að slá Facebook samskiptavefinn út þann 5. nóvember næstkomandi.

Dagurinn er kallaður Guy Fawkes nóttin í Bretlandi í höfuðið á samnefndum kaþólskum uppreisnarmanni sem tókst næstum því að sprengja breska þingið í loft upp sem og James þáverandi konung landsins árið 1605.

Anonymous er einn alræmdasti tölvuþrjótahópur heimsins og hefur meðal annars tekist að slá út heimasíður stórfyrirtækja á borð við Sony og MasterCard.

Ástæðan fyrir því að hópurinn ætlar sér að ráðast á Facebook er sökum þess að samskiptavefurinn selur persónulegar upplýsingar um notendur vefsins til ýmissa ríkisstjórna sem síðan nota þær til að njósna um viðkomandi.

Í myndbandi sem Anonymous hefur sett á YouTube þar sem Guy Fawks aðgerðin er boðuð segir að í framtíðinni muni fólk skilja að tölvuþrjótarnir gerðu rétt í að ráðast á Facebook.

Tölvusérfræðingar segja hinsvegar að árásin muni að öllum líkindum mistakast sökum þess hve samskiptavefurinn er orðinn umfangsmikill.