Argentínskur engill dauðans dæmdur í lífstíðarfangelsi

Argentínski böðullinn Alfredo Astiz, betur þekktur sem Hinn ljóshærði engill dauðans, hefur verið dæmdur í lífstíðarfangelsi fyrir glæpi gegn mannkyninu.

Alfredo Astiz var liðsforingi í argentínska flotanum á árunum 1976 til 1983. Hann var fundinn sekur um fjölda morða, pyntingar og mannrán á þessum árum. Meðal fórnarlamba hans voru tvær franskar nunnur og stofnendur mannréttindasamtakanna Mæðurnar frá Plaza de Mayo.

Astiz vann við Esma, skóla flotans í Buenos Aires, en skólinn var stærsta leynilega pyndingamiðstöð argentínska hersins meðan á hinu svokalla skítuga stríði stóð í landinu á fyrrgreindu árabili.

Af um 5.000 föngum sem færðir voru til yfirheyrslna í Esma áttu 90% ekki afturkvæmt. Sumir voru færðir fyrir aftökusveitir, öðrum var hent dópuðum í Atlantshafið.

Yfir 70 þeirra sem komust lífs af frá Esma báru vitni gegn hinum ljóshærða engli dauðans í réttarhöldunum.

Astiz, sem orðinn er 59 ára gamall var alræmdasta tákn kúgunnar frá tímum herforingjastjórnarinnar í Argentínu.