Þjálfarinn misskildi reglurnar og spilaði upp á jafntefli

Ein stærsta frétt helgarinnar er misskiliningur landsliðsþjálfara Suður-Afríku í knattspyrnu sem hélt að jafntefli myndi duga liðinu til að komast í Afríkueppnina á næsta ári.

Undankeppninni lauk um helgina og gerði Suður-Afríka jafntefli við Sierra Leone á laugardaginn. Pitso Mosimane, þjálfari Suður-Afríku, hélt að jafntefli myndi duga en það reyndist ekki rétt.

Leikmenn og stuðningsmenn fögnuðu vel og innilega eftir leikinn áður en þeim var svo kippt niður á jörðina með þeim fréttum að þeir væru úr leik - Níger hefði komist áfram.

Suður-Afríka, Níger og Sierra Leone enduðu öll með níu stig í riðlinum. Pitso hélt að heildamarkatala myndi ráða niðurröðun liða í riðlinum ef lið væru jöfn að stigum en það reyndist rangt. Hið rétta er að árangur í innbyrðisviðureignum skiptir máli og þar stóð Níger best að vígi.

„Þetta er mjög dapurlegt fyrir Suður-Afríku því landið á skilið að komast áfram í úrslitakeppnina," sagði þjálfarinn eftir leik. „Mér líður eins og mér hafi mistekist."

Pitso misskildi einfaldlega reglurnar. „Heldurðu að ég hafi skilið (sóknarmanninn) Majoro eftir á bekknum ef ég hefði vitað að við þyrftum að skora?"

„Afríka er frumskógur, vinur minn," bætti hann við. „Fyrirkomulagið á undankeppnunum í Evrópu og Suður-Ameríku er miklu betra og þar fer allt eðlilega fram. En það er mjög erfitt að spila í Afríku."

Foráðamenn knattspyrnusambands Suður-Afríku hafa nú áfrýjað þessu máli til Knattspyrnusambands Afríku og neita að viðurkenna þá túlkun á reglum undankeppninnar sem dæmdi þá úr leik um helgina.