Carlos Tevez neitar að biðja Mancini afsökunar

Carlos Tevez segir að hann hafi enga ástæðu til að biðja Roberto Mancini afsökunar og heldur því fram að liðsfélagar sínir muni standa með honum í deilunni við stjórann. Þetta hefur BBC eftir leikmanninum en blaðamenn máttu ekki spyrja Roberto Mancini út í Tevez-málið á blaðamannfundi í dag.

Mancini hefur sagt að Tevez muni aldrei spila fyrir hann aftur eftir að Argentínumaðurinn neitaði að hans sögn að koma inn á í tapleiknum á móti Bayern München í Meistaradeildinni á þriðjudaginn.

Tevez var settur í tveggja vikna verkbann þar sem hann má hvorki æfa né spila með Manchester City liðinu en Tevez segist vera saklaus í þessu máli og ætlar ekki biðja ítalska stjórann afsökunar á því sem samkvæmt honum gerðist aldrei.

Tevez segir líka að liðsfélagar hans styðji hans útgáfu af atburðunum á Allianz Arena í München. James Milner, Aleksandar Kolarov, Edin Dzeko og Pablo Zabaleta voru með Carlos Tevez á varamannabekknum þegar þetta gekk allt saman á en Tevez talaði strax um misskilning í fréttatilkynningu sinni daginn eftir.