Löw gefur lykilmönnum frí

Þeir Mesut Özil, Bastian Schweinsteiger og Manuel Neuer hafa allir verið sendir heim frá þýska landsliðinu. Þeir munu því ekki taka þátt í vináttuleiknum gegn Póllandi á þriðjudag.

Joachim Löw landsliðsþjálfari gefur leikmönnunum frí og ætlar að leyfa yngri og óreyndari mönnum að spreyta sig gegn Póllandi í Gdansk.

"Ég hef þá skoðun að það sé gott að gefa mönnum frí sem eru undir miklu álagi. Nú var tækifærið og verður gaman að sjá hvað ungu strákarnir gera í kjölfarið," sagði Löw.

Fastlega má búast við því að þeir Andre Schurrle, Mario Gotze og Ron-Robert Zieler fái að reyna sig í leiknum.