Garth Crooks: Það þarf að útrýma kynþáttafordómum úr knattspyrnunni

Garth Crooks, sérfræðingur BBC um enska knattspyrnu, segir að UEFA þurfi að taka mun fastar á kynþáttafordómum á knattspyrnuleikjum. Crooks tjáði sig um málið eftir að apahljóð heyrðust frá áhorfendum í leik milli Englands og Búlgaríu í undankeppni EM 2012 fyrir helgi.

Áhorfendur beindu hlóðunum að þeim Ashley Young, Ashley Cole, Chris Smalling og Theo Walcott sem léku fyrir enska landsliðið gegn Búlgaríu, en England vann leikinn 3-0.

Lothar Matthaus, landsliðsþjálfari Búlgara, baðst strax afsökunar á hegðun áhorfenda eftir leikinn en enska knattspyrnusambandið lagði fram formlega kvörtun eftir leikinn.

„Michel Platini hefur ávallt sagt að UEFA sýni ekkert umburðarlyndi þegar kemur að svona málum,“ sagði Crooks.

„Ég vill að Platini sanni það og refsi Búlgaríu fyrir þessa uppákomu, eins og að láta landsliðið spila fyrir luktum dyrum í næsta leik. Þetta er fínt tækifæri til að sýna ákveðið fordæmi“.

„Ef einn af þessum leikmönnum hefðu bara hætt þátttöku í leiknum og gengið af vellinum þá hefði ég staðið upp og klappað“.

„Það verður að gera eitthvað í þessum vanda og það þarf að gerast núna strax“.

Crooks átti farsælan feril í ensku úrvalsdeildinni og lék meðal annars með Stoke City,Tottenham Hotspurs, Manchester United, West Bromwich Albion og Charlton Athletic, en hann lagði skóna á hilluna árið 1990.