Margar leiðir færar án Evrópusambandsins

Það eru margar aðrar leiðir til að skapa stöðugleika í efnahagslífinu á Íslandi aðrar en þær að ganga inn í Evrópusambandið, segir Sigmundur Davíð Gunnlaugsson formaður Framsóknarflokksins.

Í samtali við Sigurjón M. Egilsson á Sprengisandi á Bylgjunni í morgun nefndi Sigmundur Davíð þrennt sem hafa þyrfti í huga við skipulagningu efnahagsmála.

Í fyrsta lagi væru fjárlög núna unnin til eins árs í einu en ekki til langs tíma, svo sem fimm eða tíu ára. Með því að vinna fjárlög til skamms tíma væri ekki hægt að gera áætlanir fram í tímann, heldur einungis til eins árs í senn

Í öðru lagi þyrftu menn að gera sér grein fyrir því að fjárfesting innanlands og innflutningur væri ekki sami hluturinn og hefði ólík áhrif á hagkerfið. Peningum sem eytt væri innanlands myndi í langfelstum tilfellum skila sér aftur til ríkisins. Aftur á móti væri mikilvægt að hafa jafnvægi á innflutningi og útflutningi.

„Nú svo þurfum við líka að líta á heildaráhrif ákvarðana. Einungis þannig getum við tekið ákvarðanir um það sem ríkið á að fjárfesta í," segir Sigmundur Davíð. Hugsanlega sé verið að fjárfesta í hlutum sem skila ríkinu litlum arði þegar hægt væri að fjárfesta annarsstaðar.