Umfjöllun: Guðjón Pétur náði í stig fyrir Valsmenn

Blikar og Valsmenn gerðu 1-1 jafntefli á rennandi blautum Kópavogsvelli í kvöld, en Valsmenn jöfnuðu metin í blálokin þegar Guðjón Pétur Lýðsson skoraði beint úr aukaspyrnu. Andri Rafn Yeoman skoraði mark Breiðabliks rétt fyrir lok fyrri hálfleiks og það stefndi allt í heimasigur. Valsmenn gefast aftur á móti aldrei upp og náðu að knýja fram jafntefli.

Grasið var rennandi blaut þegar flautað var til leiks í Kópavoginum í kvöld og leikurinn bar þess merki, en liðin áttu erfitt með að fóta sig.

Valsmenn voru ákveðnari og ívið líklegri til þess að skora og fengu nokkur fín færi en náðu ekki að nýta sér það. Blikar unnu sig hægt að rólega inn í leikinn og það bar árangur.

Andri Rafn Yeoman vann boltann inn í vítateig Valsmanna eftir mikið klafs og þrumaði boltanum í netið, alveg óverjandi fyrir Harald Björnsson í marki Valsmanna.

Staðan var 1- 0 í hálfleik en gestirnir voru alveg líklegir að koma til baka og í það minnsta jafna metin.

Valsmenn komu ákveðnir til leiks í síðari hálfleiknum og ætluðu sér greinilega að jafna leikinn. Blikar voru fastir fyrir og gáfu Valsmönnum lítið pláss.

Gestirnir fengu nokkur ágæt færi en það ætlaði að reynast erfitt að skora. Þegar komið var fram á 90. mínútu leiksins fengu Valsmenn aukaspyrnu rétt fyrir utan vítateig Breiðabliks.

Guðjón Pétur Lýðsson gerði sér lítið fyrir og skoraði beint úr spyrnunni alveg óverjandi fyrir Sigmar Inga Sigurðarson í marki heimamanna.

Jafntefli því niðurstaðan sem verður að teljast nokkuð sanngjörn úrslit. Blikar voru aftur á móti hársbreidd frá því að fara heim með stigin þrjú.



Breiðablik - Valur 1-1

Dómari: Erlendur Eiríksson (8)

Skot (á mark): 6 – 11 (3-5)

Varin skot: Sigmar 3 – 2 Haraldur

Horn: 1 – 2

Aukaspyrnur fengnar: 8–13

Rangstöður: 0-1