Rooney búinn að jafna Giggs

Wayne Rooney, leikmaður Manchester United, skoraði í dag þrennu í ótrúlegum 8-2 sigri á Arsenal og varð þar með markahæsti leikmaður félagsins frá stofnun ensku úrvalsdeildarinnar. Hann deilir því meti með Ryan Giggs en báðir hafa skorað 105 mörk fyrir félagið.

Rooney hefur skorað alls fjögur mörk í upphafi leiktíðarinnar og er nú kominn með alls 150 mörk fyrir United í öllum keppnum.

„Frammistaðan í dag var ótrúleg,“ sagði Rooney eftir leikinn. „Hvort sem að Arsenal nær að stilla upp sínu sterkasta liði eða ekki þá verðum við alltaf að gera okkar besta gegn þeim.“

„Vissulega söknuðu þeir nokkurra sterkra leikmanna en okkar frammistaða var engu að síður mjög góð.“

Honum líður greinilega vel gegn Arsenal því hann hefur áður skorað eftirminnileg mörk gegn liðinu. „Ég skoraði mitt fyrsta mark í ensku úrvalsdeildinni fyrir Everton gegn Arsenal. Þá var mitt fyrsta deildarmark með United einnig gegn Arsenal.“