Kýrin Yvonne vekur mikla athygli í Þýskalandi

Þýska þjóðin fylgist nú spennt með tilraunum dýraverndunarsinna til að bjarga kú úr skóglendi Bæjaralands en þar hefur kýrin dvalið síðan hún flúði af bóndabýli sínu í vor.

Kýrin sem heitir Yvonne flúði frá býlinu sem staðsett er nálægt bænum Muhldorf í maí. Hún hefur síðan haldið til í skóglendi og þrátt fyrir umfangsmiklar tilraunir hefur ekki tekist að ná henni aftur. Yvonne er mjög stygg, liggur í felum yfir daginn og er aðeins á ferðinni að næturlagi.

Ýmislegt hefur verið reynt að lokka Yvonne úr skóglendinu. Meðal annars var önnur kýr, Waltraud að nafni, flutt að skóglendinu en Waltraud er sögð besta vinkona Yvonne í fjósinu. Það dugði ekki. Nú á að flytja nautið Ernst á svæðið í þeirri von að Yvonne falli fyrir kynþokka Ernst, að því er segir í frétt á BBC um málið.

Lögreglan hefur gefið opið skotleyfi á Yvonne fyrir veiðimenn þar sem talið er að hún geti ógnað umferð um skóglendið. Blaðið Bild heitir hinsvegar 10 þúsund evra verðlaunum til handa þeim sem tekst að bjarga Yvonne.