Kolo Touré má byrja að æfa með City áður en bannið rennur út

Kolo Touré hefur fengið sérstakt leyfi frá enska knattspyrnusambandinu til þess að fá að byrja að æfa með Manchester City áður en leikbannið hans rennur út. Touré féll á lyfjaprófi í upphafi ársins og er í leikbanni til 2. september næstkomandi.

Touré tók inn megrunarpillur sem hann fékk hjá konu sinni og sagðist á sínum tíma ekki hafa vitað að í þeim hafi verið ólögleg efni. Hann var dæmdur í sex mánaða leikbann og í fyrstu var úrskurðurinn þannig að Touré mætti ekki taka þátt í leikjum né æfingum Manchester City á þessum tíma.

Fyrsti leikur Manchester City eftir bannið er á móti Wigan Athletic 10. september næstkomandi og nú eru ágætar líkur á því að hann geti verið með í honum í stað þess að eyða fyrstu vikunum eftir bann í að koma sér í form.