Elsti sonur Eiðs Smára færir sig um set í Barcelona

Sveinn Aron Guðjohnsen, þrettán ára sonur Eiðs Smára Guðjohnsen knattspyrnumanns, er búinn að skipta um félag í Barcelona-borg eftir því sem kemur fram í spænskum fjölmiðlum í dag.

Sveinn Aron hefur æft með yngri flokkum Barcelona undanfarin ár eins og áður hefur verið greint frá í íslenskum fjölmiðlum en samkvæmt frétt á heimasíðu spænska dagblaðsins Sport er hann í hópi fjölmargra ungra knattspyrnumanna sem fóru frá félaginu í sumar.

Samkvæmt sömu frétt er Sveinn Aron genginn til liðs við UE Cornellá sem er staðsett í sömu borg. Þaðan hafa margir góðir knattspyrnumenn komið en nærtækasta dæmið eru þeir Ignasi Miguel og Edgar Badia sem urðu Evrópumeistarar með U-19 liði Spánar um helgina. Miguel er nú á mála hjá Arsenal á Englandi en Badia hjá Espanyol.

Eiður Smári lék með Barcelona frá 2006 til 2009 en gekk nýverið til liðs við AEK Aþenu í Grikklandi og samdi við félagið til tveggja ára.