Níu tegundir af marklínutækni til skoðunar hjá FIFA

Alþjóðaknattspyrnusambandið FIFA ætlar að taka níu mismunandi tegundir af marklínutækni til skoðunar frá september til desember á næsta tímabili. Hávær krafa hefur verið uppi undanfarin ár að FIFA innleiddi marklínutækni í alþjóðlega knattspyrnu.

Ekki hefur verið greint frá því hvaða níu fyrirtæki eiga í hlut en þau eru öll frá Evrópu. Svissnesk rannsóknarstofa mun leggja mat á frammistöðu hverrar tegundar fyrir sig. FIFA ætlar að fara yfir niðurstöðuna í mars 2012 og velja þau fyrirtæki sem komast áfram í næstu umferð.

FIFA leggur mikla áherslu á öryggi tæknibúnaðarins auk þess sem dómari leiksins þarf að vita innan einnar sekúndu hvort boltinn hafi farið yfir línuna. Bæði á úr dómarans að titra auk þess sem skilaboð birtast á skjá úrsins.

FIFA hafði áður tekið níu tegundir af marklínutækni til skoðunar fyrr á árinu en hafnaði þeim öllum þar sem engin þeirra uppfyllti nákvæmniskröfur sambandsins.

Sepp Blatter, forseti FIFA, var lengi vel mótfallinn hugmyndum um marklínutækni. Hann skipti um skoðun eftir að mark Englendingsins Frank Lampard gegn Þjóðverjum í 16-liða úrslitum HM 2010 í knattspyrnu var ekki dæmt gilt. Blatter hefur sagt mögulegt að tæknin verði klár fyrir HM 2014 í Brasilíu.

Michael Platini, kollegi Blatter hjá evrópska knattspyrnusambandinu UEFA, er mótfallin tækninni. UEFA hefur kosið að skoða frekar fjölgun aðstoðardómara við enda knattspyrnuvallanna.

Chelsea vann 1-0 sigur á úrvalsliði Malasíu í gær með marki Didier Drogba. Boltinn fór hins vegar aldrei allur yfir marklínuna. Markið má sjá í myndbandinu hér að ofan.