Vinnubrögðum Arsenal gagnvart Fabregas líkt við barnarán

Sagan endalausa af Cesc Fabregas miðjumanni Arsenal heldur áfram. Nú hefur bæjarstjórinn í Arenys de Mar í Katelóníu blandað sér í málið og segir það minna á barnarán.

Fabregas yfirgaf herbúðir Barcelona aðeins 16 ára gamall árið 2003 og hefur margoft líst yfir áhuga að snúa heim til Barcelona einn daginn. Hann hefur þó ekki enn farið fram á sölu frá Arsenal.

„Við viljum að hann komi núna, hann er að upplifa barnarán,“ sagði Estanislau Fors i Garcia bæjarstjórinn í Arenys de Mar í Katelóníu. Fabregas er uppalinn í bænum.

„Ef Englendingar vilja vera þekktir sem heiðursmenn verða þeir að hegða sér almennilega,“ bætti hann við og lísti vanþóknun á fíflalátunum í Arsene Wenger knattspyrnustjóra Arsenal.

Arsenal er um þessar mundir í æfingaferð í Asíu en Fabregas er þó fjarri góðu gamni. Hann er í umsjá læknateymis Arsenal í Lundúnum og allt kapp lagt á að hann verði klár fyrir tímabilið sem hefst eftir tæpan mánuð.