Pabbi saksóknara deilir á sýslumann

Sýslumaðurinn á Selfossi gagnrýnir að yfirmenn annarra lögregluliða hafi tjáð sig um barnaníðingsmálið í Vestmannaeyjum án þess að hafa aðgang að rannsókn málsins. Björgvin Björgvinsson, yfirmaður rannsóknardeildar lögreglunnar í Reykjavík, sem gagnrýndi Ólaf Helga harðlega í byrjun vikunnar, er faðir saksóknara málsins.

Ólafur Helgi Kjartansson sendi frá sér yfirlýsingu í gær. Þar lýsir hann furðu sinni á því að settur saksóknari málsins, Hulda Elsa Björgvinsdóttir, hafi kosið að lýsa því sem mistökum, lögreglustjórans á Selfossi, að ekki hafi verið gerð krafa um gæsluvarðhald yfir manninum.

Þetta hafi Hulda gert, þrátt fyrir að vita, að óformleg samskipti hafi farið fram milli embættana um mögulega gæsluvarðhaldskröfu við upphaf málsins.

Þá segir Ólafur yfirmenn annarra lögregluliða hafa vitnað um málið í fjölmiðlum sem sérfræðingar, án þess að hafa kynnt sér rannsókn málsins.

Björgvin Björgvinsson, yfirmaður rannsóknardeildar lögreglunnar í Reykjavík, gagnrýndi Ólaf Helga á Rúv í byrjun vikunnar og sagði að hann hefði átt að krefjast gæsluvarðhalds yfir manninum sem sagður er hafa nauðgað stjúpdóttur sinni og er talinn er hafa misnotað fleiri stúlkur í Eyjum síðustu tvö, til þrjú ár. Grófustu brotin tók maðurinn upp á myndband.

Björgvin er faðir Huldu Elsu, sem er settur saksóknari í málinu. Fréttastofa náði tali af Björgvini nú í morgun og spurði hvort það væri eðlilegt að hann tjáði sig í fjölmiðlum um mál sem dóttur hans væri í forsvari fyrir, án þess að geta tengsla sinna.

Björgvin sagðist ekkert vilja tjá sig um þetta. "Bara no comment, eins og maður segir," sagði hann.