Magnús: Töpum þessu í byrjun

„Við töpum leiknum í upphafi, úrvalsdeildarlið láta ekki svona færi fram hjá sér fara. Þeir refsa okkur grimmilega fyrir arfaslaka byrjun en eftir þessar fyrstu 25 mínútur þá finnst mér við vera síst slakara liðið en það dugar ekki þar sem við skorum færri mörk en þeir og þess vegna erum við úr leik. Ég er sáttur við seinni hálfleikinn og lokin á þeim fyrr en byrjunin var arfaslök,“ sagði Magnús Gylfason þjálfari Hauka eftir 3-1 ósigurinn gegn Keflavík í 16 liða úrslitum Valitor bikarsins í kvöld á heimavelli.

„Við fengum færi til að jafna leikinn. Við höldum boltanum innan liðsins og stjórnum leiknum nokkuð vel. Við komum boltanum inn á hættusvæði en náðum ekki að skapa okkur nógu góð færi til að jafna. Það var það sama uppi á tenginum hjá mér í síðasta leik á móti Skaganum en það eru þó skref í áttina,“ sagði Magnús sem vildi sjá síðasta mark Keflavíkur aftur áður en hann fellir dóm um það en það var vægast sagt slysalegt af hálfu Daða Lárussonar markvarðar.

„Við virtumst vera í fínum málum, vorum þolinmóðir og héldum boltanum til að reyna að skora en svo kemur langur bolti en ég á eftir að sjá það hvort Daði hafi verið illa staðsettur eða hvort við vorum ekki klárir í vörninni.“

Magnús þekkir lið Keflavíkur vel og var búinn að fara vel yfir þeirra leik og efast ekki um að Haukar hefðu getað náð betri úrslitum hefði liðið byrjað leikinn betur. „Við áttum í fullu tré við þá og hefðum mögulega unnið þá ef við hefðum haldið haus fyrsta hálftímann en svo var ekki og þá er mönnum refsað, ég tala nú ekki um á móti úrvalsdeildarliði,“ sagði Magnús að lokum.